Moon Light Saiha

N O T I F I C A T I O N

MARA VERSION

He ary liata su nata daihti raopa liana heta, ko kha chhoh (w.e.f 18.8.2010 to 18.8.2011 ) chata Beino Balu (Sand) lilah achhuah heipa chata, a khoh pamai achhy thei pa a cha aw. A chhy sah chaipa hnota Mahaldership piepa cha awta,a hy hmata a bah pa saipa cha aw vei. A chhy tuhpa zyta Term & Condition ama zyh cheingei awpa a cha. A Pahnopasia khoh pa chata Office daihti liata he a ry lia mo a roh pa hnota hiahri theipa a cha aw.

A su : Forest Conference Hall,MADC
A daihti : Date 17th August,2010 at 12:00 Noon

MIZO VERSION

Heng a hnuaia hun leh hmun ruatah hian, kum khat(1) chhung atan (w.e.f 18.8.2010 – 18.8.2011 ) Tuipui Balu (Sand) lilam leh tum a ni a, a duh apiang chhan theih a ni ang. A chhang sang ber hnenah mahaldership pek a ni ang a,tumah bat phal a ni lovang. A chhangtu chuan Term & Condition a zawm ngei ngei tur a ni. Hrechiang duh chuan Office hun chhungin ahnuaia hming ziak hnenah zawhfiah theih a ni ang.

A hmun : Forest Conference Hall,MADC
A hun : Date 17th August,2010 at 12:00 Noon

Sd/-THALY T.AZYU
Deputy Conservator of Forests,
Mara Autonomous District Council
I&PO No.14/10 Siaha

Inrinni kalta khan Pu Kunal,DC,Saiha chuan Maubawk-L a tlawh a, IWDP hnuaia Watershed Committee leh SHG te a tlawh a,an harsatna tawhte a sawipui nghal bawk a,Coffee huan a thil chin hrang hrang leh Sangha Dil te a hmunah a en a ni.Bawrhsap chuan Self Help Group te chu a theih ang anga tanpui a tum thu a hrilh a,Maubawk leh Theiva inkara Coffee leh Balhla chinna hmun a tlawh chu hlimawm a tih thu leh Self Help Group hmalak belh zelna tura tangkai thei apiang a dap pui tur thu a sawi a ni. Vawk an lo talhsak chu DC chuan hetiang hi in tihtur a ni lova, keima’n ka tanpui zawk tur in ni,tiin nidangah ruai siama intihek vak tawh loh turin a ngen.DC zuitute: Marilyn Rualzakhumthangi,ADC, AZ Beisia,APO, N.Vabeiratlua,I&PRO, H.Sabi,DDK leh KVK aiawh.
Tiranga lakkhawm te halral a ni
Inrinni kalta khan New Saiha Bazar-ah TIRANGA DO chhunzawm zelna atan MHIP Sub-Hqrs Saiha chuan Tiranga lakkhawm sa halralna an nei a, MHIP te chuan Tiranga Do kumpuan an kalpuina chungchanga hmalakna-ah mipui leh pawl hrang hrang tawiawmna an ngen a ni.

EDITORIAL
Sa rate tar nawnna
chhan hi
Sa hi kan thupui ber a ni mai awm mang e ti khawp in khawlai ah thu dang dang han sawi thin mah ila,a tawpah chuan sa rate leh sa buk chungchangah bawk kan ti goal leh thin a nih hi.
Sa buk tling leh tling lo chungchangah tun thlengin inhnialna a awm a, thenkhat in sa talhtuten an duh zat zat rate an siam a,a rate kan hre tawh bik si lova, ka pe ta mai tia sawi an awm laiin sa buk a tling lo va,mahse sa ei kan chak tawh si a, kan lei a ni tia sawi a awm bawk a,thenkhatin sa lei a inchuh atul bawk si a, an kg buk tlin pawh nghak hman lovin ka pawt ta mai tia sawi a awm bawk a,hengah te hian a leitute hmanhmawh leh sa ei loh hlauh luat vanga he thil hi thleng a nihzia a lang chiang ve bawk.
MADC-LAD pawh in sa rate hi sa buktu leh a leituten an hre tawh lo nia ngaiin Sa rate chanchinbu-ah an tarlang nawn bawk. Engpawhnise sa rate siam anga lei tur a ni a,sa buk tling lo a awm chuan lei lo/ei lo ngam vek ila, sa buk chu a tling vek hrim hrim dawn a ni mai, kan tanrual a tul a ni.

HEALTH & NUTRITION DAY SAIHA-AH
Nimin piah khan New Colony-III Anganwadi Centre, Saiha-ah Village Health & Sanitation Committee bul tumin “Health & Nutrition Day” hman a ni. He hun hi Pu Kunal IAS, Deputy Commissioner Saiha chu khuallian niin a hmanpui.
Thusawiin Pu Kunal chuan ram hma sawnna leh hausakna hi naupang leh nu te hriselna-ah thui tak a innghat a ni, tiin khawtlang hruaitu VC leh tlawmngai pawl hrang hrangte chu mahni awmna veng leh khua theuhah naupang leh nuho ten Anganwandi Centre hi an chhawr tangkai ngei em ? tih enfiahpui thin tur leh tih phuisui zawkna tura sawr kar hmalakna hrang hrangte puibawm zel turin a ngen bawk a ni.
He Health & Nutrition Day hmanna ah hian Pu V.B. Sawma, Adviser to CEM, Pu Rotluanga, CDPO leh Dr. C.Lalnunsangi, Medical Officer ten an tawiawm a. CDPO Pu Rotluanga leh Dr. C. Lalnunsangi te pawhin hriattur pawimawh leh tul dangte inhrilhhriatna hun hmangin thu an sawi bawk a ni.

Pu John Rotluangliana,Deputy Speaker chuan District Level Workshop on NLUP Saiha a hawng

Saiha,Aug,4 :- Nimin khan District Level Workshop on NLUP Saiha chu Laila Hall, College vengah khuallian Pu John Rotluangliana,Dy.Speaker chuan a hawng. He programme Pu Kunal,DC Saiha kaihhruaiah hian Pu Zorammuana, Secretary,NLUP Apex Body chuan a kawhhmuhna tlangpui a sawi hnuah khuallian Pu John Rotluangliana chuan a hawng a. Tun hma NLUP kha chu sorkar leh official te kan hlawhchham a, a vawikhatna anih avangin sorkar pawhin thiam hek suh,mipui pawhin thiam hek suh,kan hlawhchham tlang a ni a.Tuna NLUP erawh hi chu NLUP tha mi, Prime Minister in a approve thlap a ni a, India sorkar laipui pawhin state danga hman atan tha a ti a,mahse kristian za a za awmna Mizoram hi a tichhuaktu kan nih avangin min enchhin phawt dawn a,sorkar pawh mipui pawhin dik tak a tia hlawhtlinpui tura theihtawp kan chhuah tlan a tul a, hei lehzel a hlawhchham chuan kan Pathian pawh kan tihmingchhia tihna a ni tel dawn a ni,a ti.Chuvangin NLUP chungchangah ngaihtuahna dik leh fel, rilru thar in put a tul a, NLUP hi hausa thutna leh dinchhuah thutna lam ni lovin rethei bakberha kan awmna dinhmun atanga inkhai chhuah a-

hmasawn zelna tur a ni zawk,tiin mipui lamin in nghakhlelh a, eptu lam hlei hlei an hmanhmawh a, hlawhtling turin hmanhmawh chi a ni lo,a hun takah NLUP hi sem a ni ang,a ti.Pu Zorammuana,Secy chuan October-November ah kan sem thei ang,a ti.
Pu S.Khipo,CEM leh khualzahawm ni bawk chuan Pathian khawngaihna zarah NLUP sem thei tura ropui taka hawn a lo ni ta hi a lawmawm tak zet a, mipui lam pawhin Pathian tih chungin rinawmna leh taimakna nen kan bei a tul a ni,a ti. Kalvary Hlychho leh C. Lalramhlunmawii(Api) chuan zaiin mipui kalkhawm an awi a ni. Vawiin dar 10 atangin District Level Workshop on NLUP hi chhunzawm leh a ni dawn a,Pu Muana,Secy chuan MADC hruaitute pawh kim taka tel turin a ngen a,TA/DA pek vek an ni ang,a ti.

Fuihna thu sawi
Nimin khan MDCC Office-ah Pu John Rotluang liana, Dy.Speaker chuan fuihna thu a sawi a, Electric leh Buhfai,etc a harsatna a awm chhan chu MNF sorkar a leiba tam tak min hnutchhiah kha kan rulh a, a kihnawk thenfai tur a tam bawk si avangin a buaithlak a,mahse a rei tawh lovang, MNF hunlai khan electric lamah pakhat mah siam belh an nei lova, lo ve deuh ik se zawng tun ang em hian harsatna kan tawk lo tur tiin MNF chu na takin a dem a ni.Pu John chuan Congress thatzia chu Congress ni loten an hrechiang ber,kei pawh MCP ah ka lut zawk a, tunah chuan a in baptist thuk ber te zinga mi ka ni,tiin Pu Hawla CM atana an neih chu a lawmawm tak zet a ni,a ti

CEM-in kan
Babu venga In chim vanga chhiat tawk te chu Rs. 1000/- in Pu S.Khipo, CEM,MADC chuan nimin khan a kan a, Pu RT. Zachono,President,MDCC chuan Rs.500 in a kan bawk.Damdawi inah kantu an tam hle.

Colony thalai chetha
ECM N.Colony Biak in bula culvert bawlhhlawhin a hnawh phui avangin nimin piaha ruahpui vanawn surah khan tuihawk chu kawngpui ah a luang phei dum dum a,kawngthlang lama awm te tan a hlauhawm em avangin New Colony thalai tlawm ngaite chuan zan pawh sawi thei tawh lovin Culvert hnawhphui sut awng hna chu lu chhum ban chhum huamin an thawk a ni. Chhochhopa tuikhur bulah an hnatlang bawk a, vawi inah an hnatlang leh ang.

In chim ah hliam tuar nual

Pi Thlamuani,Meisatla road a awm chu zan hmasa ruahsur nasa avanga leimin tawlh chuan kawngthlang lamah a hnawl thla vek a.Mi 4 chawpin a hnawl a, anmahni awmna hmun theuh atangin kawngpui an pan a,naupang ber Nazareth(4) chu leivungin a lo chhilh hman a, Vanlalhruaia(19) chuan leivung hai chawpin a chhanchhuak ta a ni.tin, Nazareth u Lalchhuanmawii pawh rangva in a lo delh a,an chhan chhuak bawk. Nazareth hi akhabe a vung a, tunah chuan a biak theih tawh a, a nu pawh a khup ah hliam a tuar bawk.

Saihatlanga Chiahei (Fakmawi nu) In pawh a chhia a,thi leh hliam an awm lova,BDO kawng leivungin a block bawk.Lalramliana,MRP Driver Police Quarter Choka a hnawl bawk a, bungrua pawh leivungin a hnawl vek bawk

New Colony a JP School thlang kawngpui phei a tuihawk luang tam lutuk avangin a thlang In (Zionthangi) In chu tuihawk luangin a hnawl tep a,mahse New Colony thalai leh Pa tlawmngai engemawzatin zanah ECM Biak in bula culver hnawmhnawkin a hnawhphui sut awng hna an thawk a,chuvangin Pi Zionthangi In leh a bul vela mi chu a him hram a ni.Helai vel hi kawng siamthat a tul tak zet a, Highway road changtute hnenah Fax pawhin thlen a ni tawh a, tun thlengin hmalakna a awm hrih lova, helai kawngpui siamthat hna hi thawh thuai a ni loh chuan kawngthlanga In te chhan hman loh hun a thleng thuai mai thei a ni,tiin mi thil chik mite chuan an sawi.

CIRCULAR
NO.B.16011/1/2010-BDO(S) : Saiha RD Block hnuaia Village Council zawng zawngte kum 2010 a PYKKA Tournament a tel tumte tan a hnuaia Hriattirna kan siam hi zawm theuh turin kan inngen a. Tin,he Tournament ah hian RD Block hnuaia PYKKA sum dawng thei tura thlanchhuah khuate reng reng tel ngei tura ngen leh hriattir kan ni a, chhan leh vang awmlo a tello chu sum tihtawp sak an ni ang.
HRIATTUR PAWIMAWHTE :
1. Block Level PYKKA Tournament hi Dt.18-20.8.2010 ah District Playground,Saiha-ah neih a ni ang. Tel tumte reng reng Dt. 12.8.2010 hmain List kimchang nen BDO Office, Saiha-ah thehluh vek tur a ni a. Hemi hun piahlama dilna reng reng pawm a ni lovang.
2. Heng Itemah te hian in elna neih a ni ang.
a) Football(Mipatan tan)- Player tur mi 22 inruat nise.
b) Volley Ball(Mipa & Hmeichhia)- mi 12 ve ve inruat nise.
c) Boxing (Mipa & Hmeichhia)-Category 5 ah mi 3 zel inruat nise.
d) Table Tennis (Mipa & Hmeichhia)-mi 3 ve ve inruat nise.
e) Athletics (Mipa & Hmeichhia)-100 mts:200 mts:400 mts;Relay Race 100×4 mts; Short Put; High Jump leh Long Jumpah mi 3 theuh inruat nise.
3. Kum 16 hnuailam tan chauh a nih avangin tel turte reng rengin Pianni hriat theihna (Birth Certificate ) an nei ngei tur a ni.Kum thuhla a rinhlelhna a awm anih chuan Document engemaw tal an nei ngei tur a ni.
4. Tel tur reng rengin mahni khua/veng flag an nei tur a ni a, Flag hring,Ft 4 a sei,Ft 2 a vang siamin flag laiah mahni khaw hming/veng a avarin an ziak ngei tur a ni.
5. Khawpui chhung bik chu Village Council angin an chhuak ang a, thingtlang lam erawh chu a khua angin chhuah tur a ni ang.
6. Football leh Voley ball bikah Jersey neih vek tur a ni a. Mimal infiamna a tel tur ten Sport bungrua an duh ang a hman theih ang a, remchanglote chu ngaihtuahsak an ni ang.
7. Lawmman Pakhatna Rs.20000 leh Trophy; Pahnihna Rs.12000 leh Trophy : Pathumna Rs.4000 pek an ni ang veng/khua tithate hnenah. Tin, mimal tithate hnenah Certifi cate inpek tel a ni ang. TA/DA inpek a ni lovang.
8. Dt18.8.2010 zing dar 10:00AM ah tel tur reng reng District Playground, Saiha ah Sport hawnna neih a nih dawn avangin mahni flag nen kim taka kal tura inhriattir kan ni bawk. He huna kallote chu tel lo tur anga ngaih an ni ang.
9. Khelh dan tur (System of Playing) leh khelh hun (Fixture) Dt.17.8.2010 ah BDO Office,Saiha-ah lam tur a ni ang.
10. He Sport chhunga Complaint a awm anih chuan ziakin Chairman, Block Level PYKKA Tournament/BDO Saiha hnenah thehluh tur a ni a.Committee thu chhuak chu thu tawp a ni ang.

This entry was posted on Wednesday, August 4th, 2010 at 1:46 pm and is filed under Recent Posts. You can follow any responses to this entry through the RSS 2.0 feed. You can skip to the end and leave a response. Pinging is currently not allowed.