Thuthar lawrkhawm
Saiha-a Principal pakhatin zirlai sazu phawrhchhuahsak a a hmul lem a lo siamsak avangin MSO Hqrs chuan Principal hi thlak nghal turin an ti
Saiha,July,21 : Nimin tlai dar 2 khan MSO Gen.Hqrs Saiha hruaitute chuan an office-ah thuthar lakhawmtute kawmna an nei a.Pu S.Vabeihasa,President,MSO(H) chuan a kaihruai a ni.MSO(H) hruaitute chuan South Point School,Meisatla-ami Principal Peter Paukholun -a’n a sikul naupang a hremna uchuak tak chungchang sawiin, Dt.8.7.2010 khan he Principal Peter hian a sikul naupang Lalnunhlua s/o Heleni of Cl-3 chu hremna chikhat atan A sazu(zang) phawrhchhuah sakin a hmul lemte a lo siamsak a,chumi pawh duh tawk lovin naupang dang(class mate) te a hmuhtir leh zel a ni.Hemi thil thleng chungchang a sikul naupang dangte an zawh kualna ah hetiang thil hi vawikhat thlenna mai ni lovin midang hnenah pawh vawi engemawzat a lo ti tawh tih hmuhchhuah thar a ni,tiin hetiang zahmawh rawngkaia inhremna hi dan kalh tlat a ni.Tin,Supreme Court pawhin a phal loh hulhual a ni a,hetianga inhremna hi ‘sex abuse’ a ni ngei ti ila, a sual a rinawm lo,sikul naupang hremna tur hmanrua dang a tam laia zahmawh rawngkaia inhrem kher hi keini MSO chuan pawi kan ti a,hetiang thil hi kan ramah thleng tawh lo se kan duh a ni,tiin an sawi a ni.
Pu S.Vabeihasa,President,MSO(H) chuan, South Point School hi Academic session laklawh a awm mek a nih avang leh sikul naupangte kan ngaihtuah avangin Academic session hi chu tha takin zo phawt se,nakum 2011-atang erawh chuan he sikul hi Saiha district huam chhung ah hawn kan remti tawh dawn lo tih hi mipui hriatah kan tarlang duh a ni.Tihluihnain emaw he sikul hi kalpui luih anih chuan MSO chuan he sikul leh staff te chungah engpawh thleng se mawh kan phur lo vang,a ti.Hemi hma pawh hian an zirlai Rochana, Philip leh Dawnga te sazu(zang) pawh a lo phawrh chhuah sak tawh a ni tih an sawi nghal bawk.
South Point School,Meisatla ah hian zirlai 120 Kg-1 atanga Cl-VII thleng a awm a,Teacher 8 an awm
An hmalak tlang pui sawiin, 1.MSO Office building sak hna chu chhunzawm mek zel a ni. 2. Nikuma School dept leh Higher & Technical dept ,Mizoram hnena an thil thlen te leh hmalak mekte tun atanga reilote-ah Aizawl lamah bawhzui a ni ang. 3. South Point School a naupang uchuak taka hrem a nih hi keini MSO Gen.Hqrs Siah chuan pawi an ti em em a,a tul angin action na takin lak an tum a ni.
Joint Meeting
Nimin khan Pu N.Chhylai,EE, PWD,Saiha hovin MTP, YLA, YMA,JCC,etc chuan EE,PWD chamber-ah Joint meeting an nei a, Saiha Town chhunga kawngpui leh veng kilkhawr thlenga kawng mam nalh taka siam dan tur an sawiho bakah hmalak zel dan tur an sawi bawk.
MJA meeting
Nimin dar 11:00 am khan Pu CZ.Hluna,president kaihhruai na hnuaiah MJA Saiha chuan meeting pawi mawh tak Press Club-ah an nei a,Press Club tihchangtlun zel dan tur leh tul dangte sawiho a ni.
Lungawilohna thleng
Saiha a 407 Owners & Driver te chuan Taxi stand leh MNF office inkar a an dinna thinah ding tawh loh tura sorkarin thu a pek avangin an lungawilohna Saiha DC hnenah an thlen a, SP,Saiha hnenah pawh hemi chung chang hi an sawipui tawh bawk.
Training hlawkpui
Training on VAT audit Manual Aizawl a zu tel Pu H.Vabeitha, Supt of Taxes,Saiha chu dam takin a lo haw,training a hlawk pui thu a sawi.
Belhchian dawl
Dr.John Hamlet Hlychho, MA, M.Ed, M.Div.M.Th, D.D, Ph.D lehkhabu ziah “ Bible Chronology” vai phek chhiarin 283 tlangzarh tak chu belhchian dawl tak niin Mizoram a lehkhabu tha ber pawl nia hriat a ni.Khawvel piantirh ata thil thleng atangin vawiin ni thlenga kohhran leh hriatzauna duhte tana pawi mawh chi hrang hrang a kim thei ang ber tarlan a ni bawk.
Electoral Roll
39-Saiha(ST) Assembly Constituency leh 40-Palak (ST) Assembly Constituency huam chhunga Electoral Roll te chu Dt.1.1.2010 qualifying date a hmang leh Registration of Electors Rules,1960 tlawh chhanin siamthat hna thawh zawh a ni ta.He Electoral Roll hi enfiah duh leh hrechiang duhte chuan Electoral Registration Officers, Office-ah te Office hun chhungin enfiah theih a ni. 40-Palak (ST) Assembly Constituency huam chhunga Draft Electoral Roll chu District Election Officers, Office ah leh Asst. Electoral Registration Officers, Office ah te Office hun chhungin enfiah theih a ni ang,tiin sawrkar thuchhuah chuan a tarlang.
PYKKA meeting
Nimin khan Pu Kunal,DC Saiha hovin Bawrhsap chamber-ah PYKKA Meeting neih a ni a, hmalak tawh sa thlir let a niin hmalak chhunzawm zel dan tur an sawiho bawk.
Editorial
Ui khuahkhirh a tul
Tunlai hian khawlaia Ui chuang vak a awm leh nual tawh a, kar kalta khan kan editor fapa pawh a seh a,midang fate pawh a seh zel lovang tih sawi theih a ni lo.Ui khuahkhirh tura Magistrate thupek dinglai pawh zah duh lova Ui thlun /khuahkhirh duh lo hote hian an Ui-in pawi a khawih zel dawn anih chuan Court hawn zel aiin a hmunah chinfel nghal zel a fuh zawk hmel.A thu hrimah mihringte hi Ui leh Ar nena leng tlang tur kan ni lo hrim hrim,chuvangin Police te hian dan dinglai tlawhchhanin khawlai a Ui vak tawh phawt chu kaphlum hmiah hmiah sela a fuh ber ang.Mihring sehtu Ui hi case siamsak hial a tul.
AIDS VANGA THI AN AWM IN :-
1. HIV/AIDS, Hepatitis B leh C te hi mitthi ruang atanga kai awlsam an ni lo. Boruakah an darh lova; ruang kil, lumen, inlenpui atangin kai theih a ni lo.
2. HIV hi tuilum 56
degree Celcius ah minute 5 chhungin a thi thei.
3. AIDS avanga thite hi an taksa a cherin,a ro tawh em em thin a.Chuvangin,an taksa atangin nasa taka tui chhuak tur a awm tawh lo zawk a.Taksa atanga tui chhuak tur awm lo chu a
hlauhawm lova, puan hula tuam a nihin a hlauhawm lo lehzual a ni.
4. Polythene-a intuam hi a theih hram chuan pumpelh nise, a chhan chu mitthi hmai tuam bo hi
lusun chhungte remtihna a telloh phei chuan mihring humhalh dan kalphung bawhchhiatna
(Human right violation) chikhata ngaih theih a ni.
5. A ka leh hnar, mawngkua leh serhkua atanga tui lo chhuak a awm reng a nih pawhin lapua leh
puanthem a hnawh phui hmasak tum ni phawt se.Chutianga tih pawh a sawt lo anih chuan
lusun chhungte remtihna la in a ruang chu tuam ni chauh se.Hetah pawh hian a lu hi a hmai
langin puan chhah taka tuam nise,a la tha tawk tho vang.Hetianga kan tih hian lusun chhungte
rilru a dam ang a,kuang zawn tute ngaih a tha bawkin a rinawm.
6. Kuang chu thisen leh tui put tlang theilo turin phui taka siam nise.Phui tawk lo deuh a lan
chuan thing charna hmangin emaw tihphui ni mai se.A tul angin kuang chhuat leh bangah chuan
puan chhah deuh kilhbelh ni thei se.
7. Mitthi chu mite tan rimchhe lutuk leh a rim dan theih siloh a nih ngawt loh chuan,kaichhawn
a hlauhawm loh avangin tihdan pangngai aia hma-a phum a ngai chuang lo.
8. Damlo/mitthi thawmhnaw emaw puan bawlhhlawh paih mai tur te chu halral mai a tha a.
Hman nawn leh turte a awm anih erawh chuan tuiso a chiah emaw sahbawn leh tui a fai taka
suk hnu a pho ro in a him tawk a ni.
9. Chhuata thisen/taksa tuiril leh bawlhhlawh dang bua te chu bleach/laisol/phenol cidex tui
(solution) emaw a tih huh puan in darkar chanve tal tihhuh tur a ni.Chumi hnuah tui pangngai
a leig fai leh mai tur.Chutiangin lei a thisen far/khal pawh heng solution hian leih a tha.
10. Hetiang natna veite leh an chhungte hi an in kiltawih a,an inthlahrung thin a,an khawngaih thlak hle.Mizoram hi heng natna te hian khawvel hmun dang ang thovin min chiah tan tawh mahse, Mizo tlawmngaihna hlu tak chhawm nung zelin keimahni tana hlauhawm silohvin mitthi ruang pawh kan sawngbawl thei a ni tih hi khawvel entawn tlakin I lantir ang u.
Mizoram State AIDS Control Society,MV-124, Mission Veng South,Aizawl,Mizoram,
Ph.0389-2321556/2321566 Fax: 0389-2320992 Email:mizoramsacs@gmail.com
