Moon Light Saiha

Saiha District Development & Vigilance Committee (SDDVC) chuan mahni hlawh phu lova In leh bungrua neite chu tutenge tih mipuite’n ziaka an thlakna tur Bawm pathum an hung dawn ta.

Saiha,July, 27 : Saiha District Development & Vigilance Committee chuan mahni hlawh phu lova In leh bungrua,etc neite chu tute nge tih mipuiten an thlakna tur Bawm an hung dawn ta.Hemi chungchang hi nimin khan Pu C.Z.Hluna,Chairman,SDDVC kaihhruaina hnuaiah rel a niin August ni 2,2010 dar 11:00 am khian Saiha Bazar,New Saiha leh Tuipang-V ah a rualin Bawm hun a ni ang a, programme tawi fel tak hman nise tih rel a ni a,karkhat chhungin mipuiten lehkha a ziakin an thlak thei dawn a, a hawn hun chu SDDVC ten an ruat leh dawn a ni.He Bawm ah hian tupawhin an thlak thei dawn a, ram hmangaih thinlung nena mahni hmuh dan theuh ziaka thlak tur a ni a, tute emaw huat vang hrim hrim a advantage lakna hmanrua atan hmang lo turin leh rilru leh thinlung taka a nihna chiah chiah kan hriat apiang ziaka thlak nise tih hi SDDVC duh tan a ni.
India sorkar hian hmasawnna Development chi hrang hrang min rawn pe a,mahse mipui hnen thleng phak a tam nge a tlem tih hi mi thil chik mite chuan an chhut nasa a, diklo taka hmangtute hi hnam leh ram hmelma an nih avangin mipui aiawh lalna ramah hian i chanvo dik tak hriat tum ve la, mipuite hian district dang rualawhna chang hre chunga he bawmah thlak tura beisei kan ni.District dangah chuan a nihna ang thlap thlapin-

Development lokal hi an hmang tha hle nia hriat a ni a, Saiha District ah erawh chuan UT hun lai atanga tun thlengin central atanga sum tam tham tak lo kal si, mahse hmasawnna hmuh tur awm chuang si lo hi SDDVC chuan hriatthiam harsa a ti hle a,chuvangin hetiang Bawm hun hi a lo buatsaih ta a ni.
Tichuan a tul angin sorkar thuneite hnenah SDDVC chuan mipui aw Bawm chhunga lo lut chu a thlen zel dawn a,action na taka la turin sorkar thuneitute a ngen nghal dawn a ni.District hrang hrangah pawh hetiang hian Bawm hun a ni tawh nghe nghe.Mipui i harh ang u.

Tiranga hal ral dawn
Dt.31.7.2010 zing dar 7:30 Am khian New Saiha Bazar ah MHIP Sub-Hqrs Saiha chuan TIRANGA halralna programme an nei dawn a, media-telpui turin an sawm.

DC-in enfiah
Kar kalta Zirtawpni khan Pu Kunal,DC,Saiha chuan Zawngling,Siatlai leh Tuipang ah BADP, BRGF leh IWDP hnuaia hna thawhte a hmunah a enfiah. Bawrhsap chuan a kalna khua-a Aganwadi leh Zirna in te a hmunah ngei enfiahin zirtirtute chu tan la zual sauh turin a fuih a.Zawngling a Mary Heichia Special Residential School (Rualban lote School) Pi Heichia enkawl lai chu tlawh nghalin tangkafai Rs.2000/- in a tanpui bawk.Bawrhsap hi Tuipang a MTP,YMA bakah VC ten lo hmuakin hnam lam te an entir a ni.DC hi BDO, ADC(P),DCSO,ACF leh PRO ten an tawiawm a ni

ZTOA press Meet
Dt.27.7.2010 dar 1:00 Pm hian Zoram Taxi Owners’ Association (ZTOA) District Hqrs Saiha chuan MJA Press Club Saiha ah thuthar lakhawmtute an kawm dawn a,hetah hian Taxi rate chung chang pawh an sawi tel dawn nia hriat a ni.

Joshua operation
Tipa Salem KTP chuan tunlai hian ‘Operation Joshua’ hmangin KTP member te tlawhchhuakin tawngtai pui an ngaihna leh Pathian tana rawngbawlna hrang hranga harsatna an tawhte zawtin tawngtai sakna hun an hmang a,an hlawkpui tih hriat a ni.

Hmasiena tichhuak
MADC Information & Publicity Department te chuan nimin khan Hma siena an tichhuak leh a, MADC Iformation & Publicity Department hian he Hmasiena hi Regular takin an tichhuak chho mek zel a ni.

Pu S.Hiato-in a sawi
Mizoram Sawrkar UD &PA Department chuan, Rural Housing Scheme hmute hnenah, a bul tan nan Kolasib-ah an sem a, hetia Urban Housing Scheme an han sem hian In sakna bungrua leh a kaihhnawihte aman an tihsan thut avangin an sem chhunzawm ngam lawk lova.
Hemi avang hian Saiha ah pawh an sem mai hreh deuh a, Pu S.Hiato,PHE Minister (Saiha bialtu) chuan, Saiha-ah chuan MADC lamin thil man an control thei dawn a, chuvangin he Urban Housing Scheme hi sem mai a tha ang, tiin UD&PA.Deptt. lam hotute a hrilh a, chumi avang chuan semchhuak tura inbuatsaihin tunah hian File pawh move mek a ni,tih, Pu S.Hiato,PHE Minister chuan a sawi.

Aso Vytuchho album siam mek

NSV leh HS Vision tangkawp a Red Ribbon icon selection leh Maraland idol thlanna a boruak siamtu ber Aso Vytuchho chuan tunlai hian album a siam mek a,Fine Tune Digital Record Studio-ah uluk taka siam mek zel a ni.
Khopai product Aso Vytuchho hi a hmanhmawh hran lova, kum tawp lamah release a tum thu ML Thalai huang a hrilh a ni.Album thupui atan “ Lyubi Hlana” (Halua phuah) chu hman a tum a ni.

Tunah hian Aso chuan hla panga a thun fel tawh a, chungte chu 1.Lyubi Hlana ( Halua phuah). 2. Ky eichapacha (John Beiza chhi phuah), 3. Khochai (Dominic Azyu phuah), 4.Lohro naphao saichi 5) Tupi Thoso (Halua).
Album a buaipui rualin Aso hian Music video shooting a nei deuh reng bawk a, hun awl hman thiam a tum hle a ni.

This entry was posted on Monday, July 26th, 2010 at 8:23 pm and is filed under Recent Posts. You can follow any responses to this entry through the RSS 2.0 feed. You can skip to the end and leave a response. Pinging is currently not allowed.