Moon Light Daily Newspaper

JNV Saiha chu Sihtlangpui ah insawn
JNV,Saiha chu Sihtlangpui ah an in sawn tan mek a, Thosai a 14 crores (Nuai 1420.43) a an school building sak zawh hunah an rawn chho leh dawn tih an hotuten ML zawhna an chhang. Cheng vaibelchhe 14 senna tur Central Javodaya Vidialaya Samiti atanga sanction a ni a,hei hi ZIDCO Mizoram chuan contract hna an thawh zawh thuai loh chuan College Vaih a kan awmna hi a chep lutuk a,kan leng thei si lova, chuvangin Sihtlangpui a JNV School building 1st phase zawhfel tawhah hian insawn turin Central atanga kan hotuten thu min pe tawh si a,bungrua pawh kan thiar tan mek a ni,tiin Thosai(Thingsen) a kan School building an sak zawh hunah kan rawn insawn chho leh dawn a, an sak zawh thuai kan nghakhlelh tak zet a ni,tiin JNV hotuten kan palai an hrilh a ni.

Driver fimkhur tul : Fur tuihawk leh chirhdiak tam laia Driver thenkhat ten kawngsir a mi an kalin zawite a an khalh thin hi a lawmawm a, Driver polite nih an hlawh a,driver thenkhat erawh chu an tlan puat puat a, kawngsir a zirlai form nena kal leh thawmhnaw fai taka inchei kal vel te chu motor ke-in tuihawk/Chirhdiak a dai per thin a,thawmhnaw fai kha a lo bal zo leh vek thin a, driver polite lo tak an ni,an ti thin. Chuvangin khawpui chhung Driver fel tak te nundan leh polite dan hi kan zir tlan a tul a,District hmel lanna chikhat a ni – Masangi

Saiha,June,26 : Nimin khan DC Conference Hall,-ah Saiha khawpui chhunga chhiarpui (Cen cus) a hming ziak ve duh lote kohkhawm a meeting neihpui an ni. He meeting hi Pu V.Lalengmawia, SDO(S) Saiha chuan a kaihruai a; Cencus pawi mawhna leh he Chhiarpui a tel a hlauhawm loh zia sawiin census hi Sakawlh nena inzawm tlat anga ngaih hi ngaihdan dik lo hulhual a ni,a ti a. He hunah hian heng mi chi hrang hrang kohkhawmte hi National Population Register (NPR) leh House Listing in an loh dan hrang hrang te hrilhfiah an ni a, Chhiarpui a tel duh leh duh lohte chiang taka zawhfiah an ni.

An duhthlanna chiang taka an sawi hun atan Dt.28.6.2010 thleng hun pek an nih thu SDO(S) chuan a sawi bawk. Pu H.Lalhmingthanga,EO ch pawhin thu sawiin, he Cencus operation India ram in kum 10 dana a lo neih thin hi khua leh tuite chuan kan zawm ngei a ngai a ni,tiin sakhuana leh sakawlh nen pawh inzawmna a neihloh thu sawiin sorkar chuan a tihtur chu a ti ngei dawn a ni,a ti a.
Election Officer chuan,India ram a cheng ni si khua leh tui pawh ni duh loh tlat mai chu an hma-ah an hma-ah buaina an la tawh theih tur thu a sawi bawk.Census Enumerators leh Supervisors te pawh he meeting ah hian telin Cencus an neihna-a harsatna an tawh hrang hrang te pawh huam zau taka sawiho a ni.He meeting ah hian Saiha khawpui chhunga Cencus a tel ve duh lo mi 49 zingah mi 30 an kalkhawm a ni.

* Saiha Meisatla-a Mi zoram Home Guard Office building sak hna zawhfel thawhkhat a ni a, Pu Vanlal mawia, OC, MRHG he building cheng nuai 8 sen na hna a tha tawk a ni,a ti.
* MCS Junior Grade exam tumte chuan passport size copy 4 kengin DC Office Saiha-ah Dt.5.7.2010 thlengin Admit Card a lam theih e- PRO.
* Mizoram a MBBS topper TT.Iahmo s/o TT.Vakhu hlawhtlinna chu nimin khan MCHP Hqrs chuan an lawmsak a ni.

* Legal Metrology department Saiha chuan bukna leh tehna diklo lutuk chu a hmunah enfiah chhunzawm zel an tum a, diklo taka buk/tehtute chu dan anga hremna pek an nih tur thu an sawi.

No. E-93/MZP-GHQ/2009-11/85 Dated Aizawl the 24th June, 2010

PRESS RELEASE
Pu Lalpiangliana, Tanhril Dt 23.6.2010-a Police kuta a awm lai a na taka hliam tuara a boral chu MZP chuan pawi a tiin a dem tak zet zet a, a kalsan tak a chhungte thinlung takin a tawrh pui tak zet a ni.
Pu Lalpiangliana hi Police Custody hnuaia sawisak ni mai lovin hmun danga hruaichhuah (kidnap) niin a lang a. Mahni sa him nana Police thuneihna hnuaia inpe hetianga sawisak tura hruai chhuah tirtu thuneitute hi MZP chuan a dem tak zet zet a, a mawhphurtu zawng chhuak a, a phu ang tawk hremna a chungah lek a nih ngei theih nan hma la turin thuneitute a ngen a ni.
He thil thlengah hian Police mai bakah pawnlam mi hnamdang inrawlh niin MZP chuan a hria a, chuvangin Pu Piangliana thihna a inhnamhnawih zawng zawngte hi a rang thei anga chhuichhuak a, criminal case a nih angin man an nih ngei a duh a, an phu ang tawk hremna pe turin thuneitute a ngen bawk a ni. He thil hi sorkar thuneituten an chhuichhuak theilo a nih chuan MZP chuan a chhuichhuah hna hi thawh tul a ti a, mipuite veng himtu tura ngaih Police te thuneihna hnuaia awm tawh hnamdang ni a rinte nen rawva taka sawisak hlum hi tun hnu-ah thleng tawh lo se MZP chuan a duh bawk a ni.
Mizote hian hnamdang kuttawrh avanga nunna chante, pawngsual leh rawkte kan tuar nasa tawh hle a, Mizo chunga rawng taka che thin hnam dangte kan Police kuta an awm hnuin kutthlak leh sawisak emaw pawn lam mi kutthlak theih tura ruahman a ni ngai lova, thuneitute hian hruai chhuah tir chu sawi loh an hmel hmuh ringawt pawh an phal ngailo a ni. Hetiang a nih laia Pu Lalpiangliana Police thuneihna hnuai atanga hruai chhuah nia hriat tur a awm hi MZP chuan mak a tiin hei hi phuba lak tumna ni ah a ngai a ni.
He thihna chungchang zing dar 3-a thleng tawh zing dar 7 vel daih a Police hnen atang pawh nilova, Tanhril VC te hnen atang daih a Home Minister-in a hria pawh hi Police rorelna fel loh zia leh mahni thiltih sual zep tumna lian takah MZP chuan a ngai a ni.
He thil thleng chungchanga hnamdang inrawlhna awm a hriat hi chhuichhuah a nih ngei MZP chuan a duh a, thuneitute kut tichak tura a inhuamna ah hnamdang abikin Gurkhali te fimkhur se a duh tak zet a. Chi leh chi inkara buaina thui zawk a thlen MZP chuan a hlau in thuneituten thilsual titute zawnchhuah kawngah chak takin hma la se a duh tak zet a ni.

sd/-
(H.LALREMSIAMA)
General Secretary

Saiha,June, 25 : Nimin tlai dar 3 khan Pu H.Lalhmingthanga, EO & I&PRO, Saiha chuan a chamber-ah thuthar lakhawmtute a kawm a. Pu Hmingte chuan Saiha chanchinbu Offset hmanga phekhlai a chhuah a lo ni ta chu Saiha District hmasawnna chikhat a ni a, a lawmawm tak zet a ni,tiin chanchinbu chhuah leh puan kawngah fimkhur a tul thu a sawi a.Chanchinbu hi sorkar leh
mipuite thu thar,etc a kan innghahna ber

in nih avangin tan in lak thar a tul tak zet a, thu belhchian dawllo te chhuah lova, thu ziahte in ennawn phawt thin tur a ni,tiin Pu Hmingte,I&PRO chuan media te chu a fuih a ni.
Pu Hmingtea chuan Saiha I&PRO thar tur Pu Atlua Nohro pawh a lo kal tep tawh a,a lo kal hma-a charge ka lak chhunga MJA te tawiawmna a dawn that avanga a lawmthu a sawi.Pu Hmingtea chuan Saiha a DDK stringer Pu H.Sabi leh Pu CZ.Hluna an chetthat zia sawiin, Saiha District thil thleng DDK in a puan tam theihna chhan hi anmahni taimakna vang liau liau a ni a, District dang zawng aiin Saiha District news a puang tam ber a,a a lawmawm tak zet a ni,a ti. NSV leh HS Vision chetthat zia pawh uar taka sawi telin an hmalakna leh an inpekna chu a fak bawk.

Saiha,June, 25 : Nimin khan Pu S.Khipo ,CEM, MADC leh Pu C.Lalro sanga, Director, DDK chuan Tourist Lodge, Saiha-ah inkawmna an nei a.Pu S.Khipo, CEM, MADC chuan Director, DDK chu Saiha leh Tuipang a Radio Station tichangtlung tura ngenna an lo siam tawhte bawhzui chak turin a ngen a.Pu Rosanga chuan kum 2007 atanga hma an lo lak tawh dan te a sawi a, Central Minister a lo kal dawn a, MADC hian Memorandum lo thehlut ula,chu chuan kan hmalakna a tichak sawt ngei ka beisei a ni,a ti a.Pu rosanga chuan Tuipang, Kolasib,Mamit,etc ah Relaying Centre siam vek a ni ang a,Saiha ah chuan lunglei Radio Station ang-

chiah kan nei theihna turin hma kan la mek a, Chief Minister leh IPR Minister pawhin recomment-na lehkha min siamsak a,kan thehlut tawh a ni,a ti a.Radio Station chu hmun laili-ah a awm atul a,zaithiam leh thusawituten an panna a remchang ber ang,Tuipang a Radio station building sak chhungin Saiha pawh upgrade hman tura hmalak a ni a,zai thiam, thusawitu,etc ten a hlawkna an chang tam ber ang,a ti.
Pu Rosanga chuan Saiha Radio Station leh DDK,VLPT centre a hmunah a tlawh nghal a, staff leh hmanrua indaih lote chu a lo ngaihtuah sak tur thu a sawi a ni.

Nimin khan ECM-CCI(M) puipate chuan Tourist Lodge Saiha-ah Inpum khatna thu sawihona meeting an nei a.Rev.ST.Zawsi, Moderator,ECM chuan a kaihruai a.Pu S.Khipo, CEM,MADC chuan inpum khatna hi Pathian leh mipui duhdan a nih avangin rilru zau taka thlira kan in pumkhat ngei a tul tak zet a ni,a ti.
* Vawiin hian Pu H. Lalhmingthanga,EO room ah Cencus chung chang sawihona meeting neih a ni dawn a,NGO,MJA te sawm bikte zingah an tel.

Editorial
Sa buktu leh a leitute
Saiha a sawi hlawh ber ni thin chu sa buk tling lo tih thu hi a ni awm e.Hemi chungchangah hian Sa talhtute leh a leitu mipuite hian mawhphurhna kan nei ve ve niin a lang.Legal Metrology department hotute leh MTP te pawhin sa buk endikin hma an han la ngial thin a,mahse sa buk laia Kg tling leh tling lo pawh hriatchian hma-in tute emaw Vawksa ei loh hlauh ngawih ngawih ni awm lang ten an lo pawt hman zel bawk si a,hei hi chu a buktu thiamloh pawh a ni bik lo, a leitu thiam loh a ni zawk tlat.
Sa kan lei dawnin sa bukna Patla kha ngun takin en ila, a tling nia kan hriat chuan lei mai ila, tling lo nia kan hriat chuan lei lo ngam ila, tichuan sa buk tling lo apiang kan lei duh lo anih phawt chuan rei lote-ah sa buk tling lo a awm tawh lovang.Mipui kan tanrual phawt a tul. Sa buk tling lo lei duh kan awm chhung chuan sa buk tling beisei lo law law ila, sawisel i bang ang u.Mipui bawk hi kan dik lo a ni tih i hria ang u. Sa hmeh lo kan hlauh luatah sa buk diktir hman lovin kan lei thin hi a zahthlak

This entry was posted on Saturday, June 26th, 2010 at 5:31 pm and is filed under Recent Posts. You can follow any responses to this entry through the RSS 2.0 feed. You can skip to the end and leave a response. Pinging is currently not allowed.